Енергетската криза повторно го притиска курсот на еврото

Еврото во четвртокот ослабе на европските пазари во однос на кошницата светски валути и повторно се приближи до најниското ниво во последните четири месеци. Падот на европската валута доаѓа под притисок на наглото поскапување на енергенсите, предизвикано од ескалацијата на конфликтот меѓу САД, Израел и Иран.

Растот на цените на нафтата и природниот гас дополнително ги влошува економските перспективи за Европа и ги зголемува стравувањата од нов бран инфлација во еврозоната. Во такви услови, носителите на политики во Европската централна банка се соочуваат со сè потешка дилема – дали да се фокусираат на ограничување на инфлацијата или да обезбедат поддршка за економскиот раст.

Економистите предупредуваат дека европската економија може да има потреба од дополнителна монетарна поддршка за да се избегне посилен економски пад.

Според последните пазарни податоци, еврото денеска ослабе за 0,25 проценти во однос на американскиот долар и се тргуваше по курс од 1,1605 долари. На почетокот на тргувањето курсот изнесуваше 1,1633 долари, а во текот на денот накратко достигна максимум од 1,1647 долари.

Ден претходно, во средата, еврото порасна за 0,2 проценти во однос на доларот, што беше прво дневно закрепнување по три последователни сесии на пад. Со тоа делумно се оддалечи од четиримесечното дно од 1,1530 долари.

Во меѓувреме, индексот на американскиот долар се зголеми за 0,25 проценти и се приближи до највисокото ниво во последните четири месеци. Инвеститорите и натаму го сметаат доларот за побезбедна инвестиција поради стравувањата дека конфликтот на Блискиот Исток може да се прошири и да има негативни последици врз глобалната трговија и светската економија.

Пазарите со внимание го очекуваат и месечниот извештај за вработеноста во САД, кој треба да биде објавен во петок. Тој извештај може да даде појасни сигнали за идната политика на каматните стапки на Федералните резерви во првата половина од годината.

Во исто време, глобалните цени на енергијата нагло пораснаа како последица од конфликтот со Иран, кој ги наруши енергетските извозни текови од Блискиот Исток. Нападите врз бродови и енергетска инфраструктура доведоа до затворање на дел од поморските рути во Персискиот Залив и прекин на дел од производството од Катар до Ирак.

Цената на нафтата „брент“ оваа недела се зголеми за повеќе од 16 проценти и достигна 20-месечен максимум од 85,07 долари за барел. Во меѓувреме, цените на природниот гас во Европа скокнаа за околу 70 проценти од крајот на минатата недела.

Аналитичарите од „Wells Fargo“ предупредуваат дека еврото се наоѓа во особено незавидна позиција. Европа наскоро влегува во сезоната на полнење на складиштата со природен гас, а Европската унија ја започнува со рекордно ниски резерви. Тоа значи дека земјите ќе мора да купуваат големи количини енергија во период кога цените може дополнително да растат.

Шефот за истражување на девизните пазари во „Deutsche Bank“, Џорџ Саравелос, оценува дека токму енергијата во моментов е клучниот фактор што го движи односот меѓу еврото и доларот.

Според него, се создава негативен шок во снабдувањето кој практично функционира како директен „данок“ за европските економии, бидејќи тие мора да плаќаат повисоки цени за енергенсите на странските производители – и тоа во американски долари.