250.000 работни места во опасност – Британија пред рецесија

Рецесија поттикната од тензиите на Блискиот Исток би можела сериозно да го погоди пазарот на труд во Велика Британија, при што до средината на 2027 година без работа би можеле да останат околу 250.000 луѓе, покажуваат анализи пренесени од The Guardian.

Британската министерка за економија Рејчел Ривс веќе иницира разговори со банкарскиот сектор за ублажување на можните последици, додека извештаи од Deloitte и EY предупредуваат на забавување на економската активност.

Според проценките, економијата на Обединетото Кралство би можела да стагнира во наредните квартали, со ризик од техничка рецесија. Се очекува и раст на невработеноста на околу 5,8 проценти, како и забавување на економскиот раст.

Клучните фактори се растот на цените на енергијата, нарушувањата во снабдувањето и глобалната неизвесност, кои дополнително го притискаат бизнис-секторот. Во исто време, инфлацијата би можела да се приближи до 4 проценти, што е значително над целта на Банка на Англија.

Истражувањата покажуваат и пад на довербата кај финансиските директори, кои како најголеми ризици ги наведуваат високите енергетски трошоци, инфлацијата и поскапото финансирање. Како резултат, компаниите се насочуваат кон кратење на трошоци и повнимателни инвестиции.

Дополнително, Меѓународен монетарен фонд ги намали прогнозите за раст на британската економија, укажувајќи дека земјата е меѓу најпогодените во групата Г7.