Во Сибир откриен непознат вид животно од леденото доба – неговите коски криеле тајна стара 250.000 години

Меѓународен тим истражувачи анализирал 20 фрагменти од коски, од кои 14 потекнуваат од Денисовата пештера во планините Алтај, во јужен Сибир.

Коските биле толку мали и оштетени што нивната форма не овозможувала да се утврди на кое животно му припаѓале. Но генетските анализи откриле посебна еволутивна линија, различна од сите досега познати живи и изумрени видови говеда.

Според истражувањето објавено во научното списание Current Biology, ова животно се одвоило од предците на современиот јак пред приближно 400.000 години.

Најстарите пронајдени остатоци датираат од пред 250.000 до 200.000 години, додека најмладите се стари околу 27.000 години.

Живеело во светот на мамутите

„Јак Икс“ бил дел од древниот екосистем во кој живееле волнести мамути, волнести носорози, степски бизони и пештерски хиени.

Научниците претпоставуваат дека животното било приспособено на студените и отворени предели што доминирале во големи делови од Евроазија за време на леденото доба.

Особено интересно е што Денисовата пештера е позната и по откривањето на остатоците од денисовците – изумрена човечка популација која некогаш населувала делови од Азија.

Истражувачите не ја исклучуваат можноста денисовците да го ловеле ова животно, но засега нема директни докази за таква поврзаност.

Колку непознати животни сè уште се кријат во древните коски?

Откритието покажува дека дури и ситни фрагменти, кои со децении можеле да останат непрепознаени, можат да откријат целосно непознати страници од природната историја.

Засега животното нема официјално научно име, бидејќи генетските докази треба да се дополнат со други податоци за неговата анатомија.

Останува отворено прашањето колку други изумрени животни сè уште не се препознаени во музејските збирки и пештерските наоѓалишта ширум светот.