Хаос на небото над Блискиот Исток: Над 1.200 летови откажани, аеродромите затворени трет ден

Главните аеродроми во регионот, вклучително и во Дубаи, остануваат затворени трет ден по ред поради ескалацијата на конфликтот меѓу САД, Израел и Иран.

Повеќе од 1.000 летови кон дестинации на Блискиот Исток се откажани од утринава поради воените операции и возвратните напади во регионот, објави The Guardian. Според последните податоци, до утринските часови биле откажани најмалку 1.239 летови.

Меѓу најпогодените авиокомпании се Emirates, со седиште во Дубаи, Etihad Airways** од Абу Даби и Qatar Airways од Доха, кои заедно откажале стотици летови. И други превозници ги суспендираа услугите низ регионот, додека Air India ги откажа летовите од Њу Делхи, Мумбаи и Амритсар кон големите европски и северноамерикански градови.

Според платформата за следење летови FlightAware, во саботата биле откажани речиси 2.800 летови, а во неделата 3.156 летови, откако започнаа американско-израелските напади врз Иран.

Воздушниот простор над Иран, Ирак, Кувајт, Израел, Бахреин, Обединетите Арапски Емирати и Катар останува речиси празен.

Последиците од конфликтот се чувствуваат и надвор од регионот, при што патници останаа заглавени на аеродроми од Бали до Франкфурт. Извршниот директор на брокерската куќа за приватни авиони „Вимана Прајват“, Амир Наран, изјави дека „Саудиска Арабија е единствената вистинска опција за оние што сакаат веднаш да го напуштат регионот“.

Доколку воздушниот простор остане затворен, се очекуваат дополнителни откажувања и сериозни нарушувања во глобалниот воздушен сообраќај во наредните денови.