Оскарите се доделуваат вечерва: Ова се главните фаворити за златната статуетка

Филмската индустрија вечерва ќе го насочи вниманието кон доделувањето на 98. издание на Academy Awards, кое ќе се одржи во Dolby Theatre во Los Angeles. Церемонијата, што ќе ја води Conan O’Brien, започнува во 19 часот по источно американско време, односно по полноќ по македонско време.

Најголемо внимание привлекува трката за најдобар филм, која годинава важи за една од најнепредвидливите во последните години. Во фокусот се филмовите One Battle After Another и Sinners. Првиот според дел од аналитичарите има мала предност, додека вториот пристигнува со силен моментум и дури 16 номинации. Вкупно десет филмови се натпреваруваат за најпрестижната награда на вечерта.

Во актерските категории се очекува помалку неизвесност кај наградата за најдобра женска улога, каде фаворит е Jessie Buckley за улогата во Hamnet. Кај машката категорија, пак, исходот е многу потешко да се предвиди. Меѓу главните кандидати се Michael B. Jordan за „Sinners“, како и Timothée Chalamet, Leonardo DiCaprio и Wagner Moura.

Слична неизвесност владее и во категоријата за режија. Во трката најчесто се споменуваат Paul Thomas Anderson за „One Battle After Another“ и Ryan Coogler за „Sinners“. Можно е токму овде наградите да се поделат – еден филм да го освои Оскарот за најдобар филм, а другиот за режија.

Годинашното издание се издвојува и по силното присуство на меѓународни продукции. Во секоја категорија има барем по еден номиниран филм кој не е на англиски јазик, што според Academy of Motion Picture Arts and Sciences е показател за сè поголемото влијание на светската кинематографија.

Сепак, главната дилема останува: дали вечерта ќе му припадне на „One Battle After Another“ или ќе биде обележана со големиот пробив на „Sinners“.