Трамп им заблагодари на Џјинпинг и Путин за „неутралноста“ по однос војната со Иран

Американскиот претседател, Доналд Трамп, го поздрави „неутралниот“ став на кинескиот и на рускиот лидер, Шји Џјинпинг и Владимир Путин во текот на конфликтот со Иран, оценувајќи дека не ги попречиле напорите на Вашингтон за ограничување на нуклеарните амбиции на Техеран.

Зборувајќи на прес-конференција за време на Самитот на групата Г-7 во Евиан, Трамп изрази благодарност кон двете земји за, како што рече, нивното воздржување од вмешување во конфликтот.

„Само сакам да им се заблагодарам затоа што ги направија работите многу полесни“, изјави Трамп по повод постигнатото примирје во конфликтот со Иран.

Тој посебно се заблагодари на кинескиот претседател Шји Џјинпинг, наведувајќи дека Кина останала „целосно неутрална“, како и на рускиот претседател Владимир Путин, за кој рече дека исто така не се вмешал во конфликтот.

„Можеше да ни биде многу потешко ако тие одлучеа поинаку“, додаде Трамп.

Во меѓувреме, официјален Пекинг изрази поддршка на меморандумот за разбирање меѓу Иран и САД, насочен кон завршување на конфликтот.

Кинескиот министер за надворешни работи, Ванг Ји, во телефонски разговор со иранскиот колега Абас Арагчи го поздравил „одговорниот и дипломатски пристап“ на Исламската Република во решавањето на спорните прашања и напредокот во преговорите.

Иранскиот министер го информирал кинескиот колега за деталите од привремениот договор со САД и изразил надеж дека Техеран и Пекинг ќе можат да ги искористат можностите што произлегуваат од меморандумот за зајакнување на билатералните односи, особено во енергетиката и економијата. (МИА)