Живот
Шведска издаде дозвола за убивање на 20 отсто од популацијата на кафеавите мечки
Шведска издала дозволи за убивање на 20 отсто од популацијата на кафеави мечки во годишниот лов на мечки, без консултација и без да ги праша на заштитниците на природата.

Официјалните лица издале дозволи за нешто помалку од 500 кафеави мечки да бидат застрелани од ловци. Тоа е околу 20 отсто од вкупната популација, според официјалните податоци, и би го намалило бројот на мечки во Шведска на околу 2000, што е пад од речиси 40 отсто од 2008 година.
Големиот број издадени дозволи ги загрижи заштитниците на природата кои велат дека големата популација на предатори во Европа може да се соочи со исчезнување во некои земји без соодветна заштита.
„Тоа е чист лов на трофеи. Управувањето со дивите животни во Шведска е убивање наместо да ги зачуваме најдобро што можеме“, вели Магнус Оребрант.
Кафеавите мечки беа ловени речиси до истребување во Шведска во 1920-те, но благодарение на внимателното управување, популацијата закрепна на врвот од околу 3300 во 2008 година.
Во текот на изминатите 5 години, сепак, се лови сè поголем број мечки, што кулминираше со рекордни 722 убиени минатата година. Годинава се издадени дозволи за отстрел на 486 мечки, а би можела да се отстрела уште неодредена бројка таму каде ќе се процени дека мечките ги загрозуваат домашните животни.
Во ноември 2022 година, новиот закон им даде на локалните ловечки здруженија поголеми овластувања за надзор на управувањето со големите предатори, вклучително и мечките. Стотици волци и рисови исто така беа убиени во последниве години, што предизвика загриженост кај еколозите.
Магнус Ридхолм, директор за комуникации на Шведската асоцијација за лов и управување со дивиот свет, вели:
„Ние само ги следиме насоките на политиката на шведската влада за дивиот свет. Сè е до рамнотежата меѓу луѓето и големите предатори. Затоа ловот на мечки започнува утре“.
Доколку следната година ловците продолжат да убиваат мечки со слична стапка, земјата ќе биде само еден годишен лов подалеку од минималниот број од 1400 што Шведската агенција за заштита на животната средина смета дека е неопходен за одржување на одржлива популација.
Истражувачите се загрижени дека кафеавата мечка го следи истиот пат како и популацијата на лосови во Шведска, вели Оребрант, која се намалила за 60 отсто од крајот на минатиот век.
Заштитниците на природата тврдат дека поголемата популација на мечки ќе ја направи Шведска поатрактивна дестинација за еколошки туризам, што ќе донесе повеќе приходи од продажбата на дозволи за лов.