Свет
САД запленија нафтен танкер во венецуелските води
Американскиот претседател потврди дека американската војска запленила танкер со нафта кај Венецуела. Венецуела ги обвинува САД дека во визир ги имаат природните ресурси на земјата.
САД запленија танкер со нафта крај брегот на Венецуела, објави претседателот Доналд Трамп. „Тукушто запленивме танкер крај брегот на Венецуела“, им рече Трамп на новинарите во Белата куќа во средата, изјавувајќи дека станува збор за „најголемиот досега запленет“ танкер. Венецуела остро го осуди инцидентот.
Видео објавено од американската државна обвинителка Пам Бонди прикажува војници како се спуштаат од хеликоптер на палубата на танкерот, а потоа се качуваат на мостот со подигнато оружје во рацете. Танкерот наводно е вклучен во нелегална мрежа за транспорт на нафта „која поддржува странски терористички организации“. Американските медиуми објавија дека танкерот бил на пат кон Куба и бил пресретнат од крајбрежната стража на САД. Венецуелското Министерство за надворешни работи остро ја осуди „кражбата“ и „чинот на меѓународно пиратство“. Венецуела е членка на Организацијата на земјите извознички на нафта (ОПЕК) и има најголеми резерви на нафта во светот. Инцидентот означува понатамошна ескалација на тензиите меѓу САД и Венецуела.
Од септември, администрацијата на Трамп постојано напаѓа бродови што им припаѓаат наводно на шверцери на дрога и распоредува воени бродови покрај брегот на Венецуела. Венецуелски претседател Николас Мадуро се сомнева дека САД планираат да го соборат.
Трамп го обвинува Мадуро за фалсификување на неговиот реизбор во јули 2024 година и за контрола на нарко-картелите и нивно намерно користење против САД. За разлика од својот сосед Колумбија, Венецуела не произведува дрога во големи размери, но се смета за транзитна земја.
