По ураганот Рафаел, Куба погодeна и од земјотреси

Откако ураганот Рафаел предизвика уништување и уште еден широко распространет прекин на електричната енергија на западниот дел од островот во средата со ветрови до 185 километри на час, два земјотреси го потресоа југоисточниот дел на земјата во неделата наутро по локално време. По првичниот земјотрес со јачина од 5,8 степени, имаше посилен последователен потрес со јачина од 6,8 степени.

Според Националниот сеизмолошки центар на Куба, епицентарот бил на околу 35 километри од брегот на провинцијата Гранма и на околу 175 километри од главниот град Сантијаго де Куба.

При вториот, посилен земјотрес, речиси половина час по првиот, луѓето панично истрчале од своите куќи. Меѓутоа, првично беа пријавени само одрони, оштетени куќи и дополнителни прекини на електричната енергија.

Шефот на државата ги посети погодените региони

Прекинот на струја низ целата земја предизвикан од ураганот Рафаел беше решен дури во петокот во повеќето региони на Куба. Сепак, многу населени места останаа без струја и во текот на викендот, пред сѐ затоа што требаше повторно да се подигнат столбовите и да се поправат трансформаторите.

Шефот на државата Мигел Дијаз-Канел од средата посети неколку региони и населби во главниот град Хавана кои беа особено погодени од ураганот и вети брза помош. Во неделата, на платформата X, Дијаз-Канел ги повика луѓето во регионот погоден од земјотресот да останат на отворено.

Апсења по протестите

Во меѓувреме се протестира поради долготрајните прекини на струја. Според државните информации, се води истрага за повеќе лица за нанесување телесни повреди, за нарушување на јавниот ред и мир и за оштетување на имот. Организацијата за човекови права Јустиција 11Ј извести за повеќе од десетина апсења во градот Гуанабакоа во источна Хавана. Луѓето претходно мирно учествуваа на протестите.

Електричната мрежа колабираше во октомври откако откажа најголемата од осумте кубански електрани на јаглен.