Локални избори 2025: Излезноста достигна 41,76%, убедлива победа на ВМРО-ДПМНЕ и во вториот круг

ВМРО-ДПМНЕ и коалицијата која што ја предводи, според освоените резултати од двата круга на локалните избори, ќе има градоначалници во Скопје и во 54 општини, односно вкупно 55 градоначалници низ државата.

Втора по ред по бројот на освоени градоначалнички места е коалиицијата Вреди со освоени девет општини.

НАИ освои четири градоначалнички места, а  ЗНАМ, Демократската партија на Турците и Унијата на Ромите, по еден градоначалник.

Две општини ќе ги водат независни кандидати.

Во вториот круг од локалните избори одржан вчера, се избираа градоначалници во 32 општини и во Градот Скопје. На 19 октомври, пак, во првиот круг, беа избрани 44 градоначалници.

Во четири општини – Гостивар, Врапчиште, Центар Жупа и Маврово и Ростуше вчера немаше гласање, а причина за тоа е недоволниот одѕив на гласачи во првиот круг, поради што ќе се спроведе нова изборна постапка во рок од 60 дена од објавувањето на конечните резултати од локалните избори 2025.