Двајцата астронаути се заглавени на Меѓународната вселенска станица поради проблеми со леталото кое треба да ги врати на Земјата. А, нивниот престој, кој веројатно ќе биде продолжен до 2025-та, е далеку од удобен… Веќе две децении се извршуваат успешни мисии на Меѓународната вселенска станица. Бројни астронаути престојувале на станицата и безбедно се враќале на Земјата, но двајца астронаути што моментално се наоѓаaт таму, веројатно ќе биде „заглавени“ до следната година. Во јуни годинава, астронаутите беа лансирани до станицата на мисија која требаше да трае осум дена. Но, поради проблеми со леталото Boeing Starliner, астронаутите нема како да се вратат на Земјата. Моментално леталото е прикачено за станицата (се гледа на фотката подолу), но не може безбедно да ги врати назад. Во средата (07.08), од НАСА изјавија дека астронаутите Бач Вилмор и Суни Вилијамс можно е да останат на станицата до февруари 2025 година, доколку не успеат да го поправат леталото порано. Во февруари следната година е планирана друга мисија, со друго летало, на кое ќе има место за Бач и Суни. Рекордот за најдолг непрекинат престој на станицата е 371 ден и му припаѓа на астронаутот Франк Рубио. Но, само затоа што некои астронаути поминале повеќе од една година во вселената, не значи дека станицата е пријатно место за живот, особено ако астронаутите мислеле дека ќе се вратат за нешто повеќе од една недела. Па, како изгледа животот на заглавените астронаути? Многу мал простор за спиење Поради микрогравитацијата, во станицата е невозможно да се спие на кревет, како на Земјата. Па, астронаутите имаат „станици за спиење“, а просторот на располагање е колку телефонска говорница со кабина (како оние во Лондон). Тие спијат во вреќи за спиење кои се закачени на ѕидот и самите мораат да бидат добро прицврстени во вреќата за да не „одлетаат“. Покрај тоа, поради бројните машини, во станицата постојано има некаква врева, па астронаутите мора да носат тампони за уши. Истовремено, на станицата нема ден и ноќ бидејќи ја обиколува Земјата 16 пати во еден ден. Па, тие треба да носат и маска на очите за да го натераат мозокот да мисли дека е ноќ. Не можат да се тушираат Очигледно, водата се однесува многу поразлично во микрогравитација, што значи туширањето е невозможно. Кога сакаат да се истушираат, астронаутите користат влажна, а потоа сува крпа за телото. За косата користат специјален шампон кој не треба да се плакне – нешто како шампон за суво миење. Миењето заби им е полесно, но не смеат да ја плукнат водата каде било, туку во посебни садови кои ја заробуваат внатре. И одењето во тоалет е предизвик И за тоалетните школки е потребна вода – нешто што не е изводливо во микрогравитација. Па, астронаутите користат специјално дизајнирани тоалети со вакуум. Тоалетот е дизајниран така што го компресира и дехидрира изметот, додека течната урина се филтрира и прочистува, со што се трансформира во вода за пиење. Работат по 16 часа дневно Нормално, најголемиот дел од времето на станицата астронаутите го поминуваат во работење. Смените им траат по околу 16 часа, со паузи за јадење. Нивните обврски вклучуваат одржување на станицата, изведување експерименти, а некогаш и „вселенски прошетки“, надвор од неа. Астронаутите кои се заглавени на станицата ќе си продолжат со активностите кои инаку би ги вршеле други астронаути, а споделија и дека периодов ги следат Олимписките игри за да го пополнат слободното време. Консумираат дехидрирана храна и никако не смеат да пијат алкохол Со цел да зафаќа помалку простор и да трае подолго, голем дел од храната на астронаутите е дехидрирана. Во станицата тие сами додаваат вода во амбалажите и потоа ја загреваат. Некогаш имаат и свежи продукти, но тие сепак се реткост. Резервите на храна на станицата се дополнуваат на секои 2-3 месеци, со летало без екипаж. Очекувано, пиењето алкохол во станицата е забрането бидејќи астронаутите секогаш треба да бидат подготвени да се справат со потенцијални проблеми. Мораат да вежбаат двапати дневно Мускулите лесно можат да атрофираат во микрогравитација, па астронаутите мора да вежбаат. Тие имаат специјално дизајнирани справи за вежбање, како статични велосипеди. Двајцата астронаути на станицата се пофалија дека деновиве си организирале и „Олимписки игри во бестежинска состојба“ за да си го одвлечат вниманието од ситуацијата со којашто се соочени.
