Европа може да се ослободи од зависноста од нафта и гас доколку инвестира 2 трилиони евра во обновливи извори на енергија

Во извештајот, објавен од Институтот за истражување на климатските влијанија во Потсдам, се вели дека на континентот ќе му требаат годишни инвестиции од 140 милијарди евра до 2030 година и 100 милијарди годишно во деценијата потоа за да го постигне тоа, објави СЕЕбиз.

Додека поголемиот дел од износот би бил потребен за проширување на ветерните електрани на копно, соларните, водородните и геотермалните извори ќе бидат дополнителни столбови на стратегијата што ќе овозможат потребите за електрична енергија на Европа да бидат обезбедени исклучиво од обновливи извори до 2030 година. Ќе биде потребна уште една деценија за целиот енергетски систем, вклучувајќи го, на пример, греењето што моментално се напојува со нафта или гас, да се претвори во обновливи извори на енергија.

„Овие бројки се високи, но важно е да се каже дека се проценува дека европските земји потрошиле 792 милијарди евра минатата година само за статус кво на системот за заштита на потрошувачите од ефектите на енергетската криза предизвикана од руската инвазија на Украина“, се наведува во студијата.

Минатиот месец, европските пратеници дадоа конечно одобрување за правно обврзувачките цели за побрзо проширување на обновливите извори на енергија оваа деценија, централниот дел на плановите на Европа за борба против климатските промени и оддалечување од фосилните горива. Законот ги подигнува целите на ЕУ за обновлива енергија, барајќи 42,5 отсто од енергијата на ЕУ да биде обновлива до 2030 година, заменувајќи ја претходната цел од 32 отсто.