Метео: Врнежи и засилен ветер во наредните денови

Променливо и нестабилно време со врнежи и грмежи ќе се задржи до четврток, информира Управата за хидрометеоролошки работи.

Денеска времето ќе биде облачно со повремени врнежи од дожд, пообилни во западните делови од земјава. Ќе дува умерен до засилен ветер од северен правец, што дополнително ќе придонесе за чувство на посвежо време.

Утринските температури ќе бидат најниски во Берово, околу 1 степен, додека највисоките дневни ќе достигнат до 15 степени во Скопје.

Во главниот град се очекува променливо облачно време со повремен дожд и слаб до умерен северен ветер, со температури од 7 до 15 степени.

Од УХМР предупредуваат дека под влијание на циклонска активност, на одделни места може да наврнат и над 30 литри дожд на квадратен метар.

И во следните денови времето ќе остане нестабилно, со повремени врнежи и грмежи. Локално се можни поинтензивни процеси во форма на невреме со пороен дожд и засилен ветер, особено во западните и јужните делови. Температурите ќе бидат во опаѓање, а во четврток и петок утринските вредности на некои места може да паднат и под нулата.