Си Џинпинг со апел за стабилност на поморските рути

Кина повика на итно намалување на тензиите околу Ормускиот Теснец, предупредувајќи дека продолжената блокада може да има сериозни последици врз глобалната економија и енергетската стабилност.

Си Џинпинг упати апел за повторно отворање на оваа клучна поморска рута, нагласувајќи дека непречениот транспорт е од суштинско значење за светската трговија и снабдувањето со енергенси.

„Слободната пловидба низ Ормускиот Теснец е клучна за стабилноста на глобалните пазари. Потребна е воздржаност и почитување на меѓународното право, а дијалогот останува единствено решение“, порача кинескиот претседател.

Од Пекинг оценуваат дека ескалацијата во регионот може да доведе до раст на цените на енергенсите и дополнителни нарушувања во синџирите на снабдување.

Иако Кина формално не зазема страна, нејзиниот став се толкува како јасен повик за дипломатско решение и избегнување на понатамошно заострување на ситуацијата.