Јагуарите се препознатливи по жолто-портокаловото крзно и уникатните шари со точки. Тие живеат во помали, изолирани шумски подрачја низ Јужна, Централна и делови од Северна Америка. Според Црвената листа на IUCN, јагуарите се класифицирани како „речиси загрозени“ и се најголемите мачки во Америка, како и единствениот жив претставник на родот Panthera на овој континент.
Пред околу еден век, јагуарите биле многу почести – нивното живеалиште се простирало од Аризона и Ново Мексико во САД, па сè до Аргентина. Денес, поради уништување на шумите и деградација на живеалиштата, тие изгубиле околу 46% од својата природна територија. Најголемиот дел од преостанатата популација денес живее во Амазонскиот басен, но и таму бројот продолжува да опаѓа.
Еве неколку интересни факти што можеби не сте ги знаеле за јагуарите.
Брзи факти
-
Народно име: Јагуар
-
Научно име: Panthera onca
-
Просечен животен век во дивина: 12–15 години
-
Во заробеништво: до 20 години
-
Статус според IUCN: Речиси загрозен
1. Јагуарите имаат најсилен загриз меѓу дивите мачките (во однос на големината)
Јагуарите имаат масивно тело, силни заби и голема глава, што им овозможува исклучително моќен загриз. Иако загризот на тигарот е посилен во апсолутна смисла, јагуарот има најсилен загриз во однос на својата големина. Со вилиците може директно да ја пробие черепната коска на пленот, па дури и дебелата кожа на кајман.
2. Обожаваат вода
За разлика од повеќето мачки, јагуарите немаат проблем со водата. Тие се одлични пливачи и најчесто живеат во близина на реки, мочуришта и езера. Од сите големи мачки, јагуарите се најтесно поврзани со водени живеалишта.
3. Територијата на мажјаците е двојно поголема
Во Мексико, мажјаците контролираат територии од околу 100 квадратни километри, додека женките имаат околу 46. Мажјаците поминуваат и поголеми растојанија дневно и активно ја обележуваат територијата со гласови, мирис и гребење дрвја.
4. Јагуарите се самотници
Тие живеат и ловат сами. Женките сами ги одгледуваат младенчињата, а младите јагуари почнуваат самостојно да ловат на околу две години.
5. Често ги мешаат со леопарди
Иако изгледаат слично, јагуарите имаат поголеми и покомплексни шари со точки, кои често опкружуваат помали точки внатре. Имаат и поцврсто тело, пократки нозе и поширока глава. Најважно: јагуарите живеат во Америка, а леопардите во Африка и Азија.
6. Ловат и дење и ноќе
Јагуарите се активни и преку ден и ноќе. Благодарение на одличниот ноќен вид и природната камуфлажа, успешно ловат ноќен плен. Истражувања покажуваат дека во некои региони дури 70% од нивната активност е ноќна.
7. Инспирација за митови и легенди
Јагуарот има силно место во митологијата на домородните народи во Америка. Името потекнува од зборот „yaguara“, што значи „див ѕвер што го совладува пленот“. Се појавува и во културите на староседелските племиња во југозападниот дел на САД.
8. Можат да рикаат
Како лавовите и тигрите, јагуарите можат да рикаат, но не можат да предат. Нивното рикање е дел од комуникацијата, особено за време на парење – нешто што, за жал, често го користат ловокрадците.
9.Непребирливи ловци
Јагуарите јадат речиси сè – цицачи, птици, влекачи, па дури и добиток. Често ловат на земја, но можат и да се искачат на дрво и да нападнат одозгора. Големиот плен го јадат неколку дена за да заштедат енергија.
10. Јазикот им помага при јадење
Јазикот на јагуарот е груб и покриен со ситни папили кои му помагаат да го отстрани месото од коските и да се чисти.
11. Црните јагуари не се реткост
Околу 10% од јагуарите имаат црно крзно (меланизам). Во густите шуми на Костарика, овој процент достигнува дури 25%, што укажува на предност во камуфлажата. Одблиску, и црните јагуари имаат точки, само што се потемни.
Интересен факт: „Црн пантер“ не е посебен вид, туку општ назив за црни јагуари или леопарди.
12. Веќе изгубиле половина од својата територија
Историски, јагуарите живееле од југозападот на САД до Аргентина. Денес се речиси исчезнати од многу северни региони. Амазонската прашума сега содржи околу 57% од светската популација на јагуари. Камерите за истражување на дивиот свет во Аризона сепак регистрирале појава на неколку машки јагуари во последната деценија.
