По половина век, астронаути повторно патуваат кон Месечината

По повеќе од половина век, луѓето повторно се на пат кон Месечината. Со мисијата Артемис 2, НАСА успешно ја лансираше ракетата SLS од Вселенскиот центар Кенеди, носејќи четиричлен екипаж во капсулата Орион. Летот започна во вечерните часови, а леталото брзо влезе во орбитата на Земјата.

Астронаутите – Рид Вајсман, Виктор Гловер, Кристина Кох и Џереми Хансен – ќе ја обиколат Месечината во рамки на десетдневна мисија. Слетување не е планирано, но мисијата има клучна улога во подготовките за идни човечки мисии.

Кратко по полетувањето имаше прекин во комуникацијата со екипажот, но проблемот брзо беше решен. Летот во голема мера ќе се одвива автоматски, со повремено рачно управување за тестирање на системите.

Екипажот ќе помине повеќе од 2,3 милиони километри и во одреден момент ќе се најде зад темната страна на Месечината, каде привремено ќе нема контакт со Земјата.

Мисијата е дел од програмата Артемис, чија цел е враќање на луѓето на Месечината и воспоставување трајно присуство, како и подготовка за идни мисии кон Марс.

Во проектот учествуваат и меѓународни партнери, вклучително и Европската вселенска агенција, која придонесе со клучни компоненти за леталото.

Ова е прва мисија со екипаж кон Месечината по ерата на програмата Аполо во 1970-тите, што ја прави значаен чекор во современото истражување на вселената.