На светот му се заканува масовен глад доколку веднаш не се отвори Ормуската Теснина

Работна група на Обединетите нации предупреди дека светот се соочува со криза од масовен глад доколку  Ормуската Теснина наскоро не биде отворена за сообраќај.

Според нивните проценки, околу 45 милиони луѓе би можеле да останат без храна поради недостаток на ѓубрива чии транспортни патишта во моментов се блокирани заради војната која ја предизвикаа Израел и САД.

Мореира да Силва, извршен директор на Канцеларијата на ОН за проектни услуги (UNOPS), истакна дека во нормални околности една третина од светските залихи на ѓубрива, вклучувајќи амонијак, сулфур и уреа, минуваат низ овој поморски премин.

„Ни остануваат само неколку недели за да спречиме она што многу добро би можело да се претвори во голема хуманитарна криза“, изјави да Силва за француските медиуми.

Проблемот е првенствено поврзан со роковите во земјоделското производство.

„Сезоната на сеење не може да чека“, предупреди да Силва, нагласувајќи дека во некои африкански земји тие рокови истекуваат за неколку недели.

Покрај Африка, блокадата особено силно ќе ја погоди безбедноста на храната во Азија. Експертите предупредуваат дека ширењето на кризата е само прашање на време.

„Доколку наскоро не ја спречиме причината за кризата, ќе можеме да се справиме со последиците само преку хуманитарна помош“, заклучи да Силва.

Работната група на ОН наведува дека отворањето на теснината е клучно за стабилизирање на глобалниот пазар на храна, бидејќи недостатокот на ѓубрива во оваа фаза од земјоделскиот циклус може да има долгорочни последици врз приносите низ целиот свет.

Извор МИА