Случајно откритие во Египет: Пронајдена гробница стара 3.000 години со зачувани слики

Археолози во близина на Луксор во Египет открија досега непозната гробница стара околу 3.000 години, додека расчистувале терен за да ги заштитат другите древни гробници од можни ненадејни поплави.

Внатрешноста изненадила со исклучително добро зачувани ѕидни слики. На нив е прикажан човек по име Пасер, неговата сопруга, како и религиозни сцени поврзани со верувањата на древните Египќани за задгробниот живот.

Особено интересно е што откритието не било резултат на планирана потрага по нова гробница – истражувачите всушност отстранувале наслаги и отпад со цел да спречат водата да ги оштети веќе познатите археолошки локалитети.

Сега следува детално проучување на натписите и сликите, кои би можеле да откријат повеќе за Пасер, неговата положба во општеството и животот во древен Египет пред три милениуми.