Најмногу врнежи изминатите 24 часа се измерени на Попова Шапка, 27 литри на метар квадратен, а најмалку во Демир Капија, шест литри на единица површина.
До 8:00 часот наврнале и 26 литри на метар квадратен во Крушево и Пожаране, 22 во Маврови Анови, 20 во Тетово, 18 во Скопје-Петровец, Скопје-Зајчев Рид и Пожар-Радовиш, 13 во Лазарополе, Претор и Гевгелија, 12 Берово, Велес и Куманово, 11 во Крива Паланка и Прилеп, 10 во Битола, Виница и Струмица, 9 во Охрид и Штип, 7 во Кавадарци, како и 6 литри на единица површина во Демир Капија.
Времето денеска ќе биде облачно и свежо со повремени врнежи од дожд. Наместа врнежите ќе бидат обилни и до крајот на денот ќе наврне над 30 l/m2. Кон крајот на денот на повисоките планини на северозапад ќе има услови врнежите од дожд да преминат во повремен слаб снег. Претпладне ќе дува слаб до умерен југоисточен, а попладне и во текот на ноќта наместа долж Повардарието повремено засилен ветер од северен правец (над 60 km/h). Максималната температура ќе биде во интервал од 11 до 15 степени.
Во Скопје, oблачно и свежо со врнежи од дожд, повремено пообилни. Ќе дува слаб до умерен, а попладне во делови од котлината повремено засилен ветер од северен правец. Максималната температура ќе достигне 14 степени.
