ДЗС работи на обука на пилоти пред сезоната на пожари

Директорот на Дирекцијата за заштита и спасување, Стојанче Ангелов, го посети спортскиот аеродром во близина на Штип, каде оствари средба со Раде Ивановски, сопственик на компанијата „Римин Еар“ и поранешен пилот и инструктор.

На средбата се разговарало за можностите за обука на нови пилоти за авиони „ер трактор“, кои се користат за гаснење пожари. Ангелов се сретнал и со тројца кандидати со повеќе од 300 часа искуство во спортско летање, а воедно реализирал и извидувачки лет над штипскиот регион со еден од нив.

Во моментов, Дирекцијата располага со пет пилоти за овие летала. Еден авион е веќе оперативен, додека два се на сервис и се очекува да бидат вратени и подготвени за употреба во текот на април, најдоцна до мај.

Со овие подготовки, институцијата има за цел поефикасно да одговори на предизвиците од претстојната сезона на пожари на отворено.