Германците штедат на храна, историски пад на продажбата

Во германскиот малопродажен сектор, продажбата невообичаено драстично падна.

Посебно сериозен е падот на откупот на прехранбени производи – веројатно поради поскапувањето. Но, има и проблеми со испораката.

Германските трговци на мало претрпеа неочекуван остар пад на продажбата во април поради високата инфлација. И покрај олеснувањето на мерките за коронавирус, нивниот приход беше за 4,7 отсто помал од претходниот месец – според Федералното биро за статистика. Ако се игнорираат цените, реалниот минус бил дури 5,4 отсто.

„Вистинската продажба на тој начин достигна најниско ниво од февруари 2021 година“, велат статистичарите. Економистите очекуваа просечен пад од само 0,2 отсто.

Историски пад на продажбата

Најмногу падна продажбата на храна. За споредба, трговијата со непрехранбени производи реално опадна за 4,4 отсто, додека трговијата со храна опадна за 7,7 отсто. „Ова беше најголем пад на продажбата од месец во месец од 1994 година“, објаснуваат статистичарите.

Ваквиот развој на настаните веројатно е последица на значителното зголемување на цените на храната предизвикани од наложеното наметнување санкции и лошите политички одлуки кои директно удираат на буџетот на граѓаните. Тие беа за 8,6 отсто повисоки во април во однос на претходната година. Инфлацијата на цените на храната повторно е значително над просечниот раст на потрошувачките цени, кој во април изнесуваше 7,4 отсто. Во Германија сеуште никој не превзема одговорност за настанатата ситуација.