Супер тајфунот Рагаса ја погоди Кина, 14 мртви во Тајван, 124 исчезнати

Супер тајфунот Рагаса, кој беше прогласен за најмоќен тропски циклон во светот оваа година, го погоди Хонг Конг на 24 септември со ветрови со сила на ураган и поројни дождови, додека обилните дождови во кинескиот регион Тајван предизвикаа 14 смртни случаи, додека 124 лица се водат како исчезнати.

Бариерното езеро Матаи’ан Крик во источниот округ Хуалиен во Тајван, кое беше преплавено од надојдените реки, се прелеа и поплавните води го поплавија општината Гуангфу во округот Хуалиен, каде што е регистриран најголем број жртви, соопштија локалните власти, објави Ројтерс денес.

Во Хонг Конг, огромни бранови поплавија некои блиски патишта и станбени згради, а меѓу поплавените згради имаше и хотели лоцирани во близина на брегот.
Поплави ги погодија и оддалечените кинески острови во близина на Хонг Конг, вклучувајќи го и Лантау, дом на меѓународниот аеродром во градот.
Тајфунот Рагаса, со ветрови до 200 километри на час, се очекува да го погоди Хонг Конг подоцна во текот на денот, со епицентар на околу 100 километри јужно од густо населената територија, и се очекува да го задржи интензитетот на супертајфунот додека се движи кон брегот на кинеската покраина Гуангдонг, дом на повеќе од 125 милиони луѓе, каде што се очекува да стигне до копното околу пладне по локално време.

Хонг Конг издаде предупредување за тајфун од ниво 10 рано утрово, највисоко ниво на предупредување, повикувајќи ги бизнисите и транспортните услуги да затворат.

Властите, исто така, предупредија за зголемување на нивото на морето и отворија 49 привремени засолништа.
Предупредување од ниво 10 е издадено и во Макао, а во Гуангдонг, властите евакуираа повеќе од 770.000 луѓе, соопшти државниот радиодифузер CCTV.
Училиштата и транспортните услуги, вклучително и брзите железници, беа затворени, додека летовите беа откажани на најпрометните аеродроми во регионот во Гуангжу и Шенжен.
Кинеските поморски власти издадоа највисоко ниво на тревога „црвено“ за прв пат оваа година за делови од покраината Гуангдонг, вклучувајќи ги Гуангжу, Шенжен, Фошан и Донггуан, најголемите градови на рутата Рагаса, каде што живеат околу 50 милиони луѓе.

Кинеското Министерство за вонредни ситуации испрати десетици илјади шатори, склопливи кревети, опрема за осветлување за итни случаи и други средства за спасување во погодените области, објавија кинеските државни медиуми.