Словачка ќе намали популацијата на мечки поради зголемена опасност за луѓето

Братислава, 3 април 2025 – Словачките власти донесоа одлука за отстрел на 350 кафеави мечки поради зголемената опасност што ја претставуваат за луѓето, откако еден човек загина во напад на мечка во регионот Бистрица.

Според словачкото Министерство за животна средина, популацијата на мечките во последните години значително се зголемила, што довело до почести средби со луѓето. По неодамнешниот смртоносен напад, владата одлучи да преземе драстични мерки за намалување на нивниот број.

„Безбедноста на граѓаните ни е приоритет. Ќе спроведеме внимателен и селективен отстрел за да ја вратиме рамнотежата во природата и да ги заштитиме луѓето“, изјави министерот за животна средина Томаш Тараба.

Одлуката предизвика поделени реакции. Додека локалните жители и ловечките здруженија ја поддржуваат мерката, еколозите и активистите за заштита на животните ја осудија како прекумерна. Некои организации најавија протести и правни постапки за да се спречи масовниот отстрел.

Според официјалните податоци, во Словачка живеат околу 1.275 мечки. Експертите предупредуваат дека неконтролираната урбанизација и уништувањето на шумите ги принудуваат овие животни да бараат храна поблизу до населбите, зголемувајќи го ризикот од конфликти со луѓето.

Владата најави дека ќе разгледа и алтернативни решенија, како засилено оградување на населените места, едукација на граѓаните и подобрена стратегија за управување со мечките во иднина.