Родителите со иницијатива: Стоп за задолжителното носење на маски во училиштата

Додека вакцинираните и прележаните се гласни за олеснување на мерките, децата на училиште молчат, а ги дисциплинираат како да се роботи. Дишат низ маски по седум часа, а освен тоа им земаат брисеви по случаен избор, им вперуваат топломер како пиштол во глава секој ден, седат на провев и не можат веќе да издржат, реагираат родителите.

Аргументот дека долготрајното носење маски е штетно по здравјето на учениците, тие го образложуваат во барањето испратено до Комисијата за заразни болести и до Министерството за здравство.

 

 

„Континуираното носење маски е исклучително тешко по здравјето на нашите деца, особено што децата се приморани да носат и маски за време на часовите по физичко воспитување, спротивно на сите препораки од СЗО и експерти. Истото не е предвидено ниту во протоколот за работа во основните и средните училишта,но сепак истото се уште се практикува“, се вели во барањето.

Од иницијативата предлагаат и засилена контрола при детектирање на болни деца, но строго се противат на скрининг и тестирање на дневна основа, бидејќи сметаат дека тоа ги трауматизира децата.

Како маската може да го загрози здравјето повеќе од ковид, родителите не коментираат, како што надлжните не коментираат како пак маската заштитува од ковид. Тие се согласуваат дека носењето маска ги штити децата од заразување со вируси до некој степен, но многу од нив веќе имаат некаков вид имунизација против ковид, прележале, и сметаат дека маската во ваков случај нема логика, па дури и штети.

Доколку не им биде разгледано барањето, родителите велат дека ќе излезат на протести.

Маските не се штетни само за менталното здравје на децата, туку и за физичкото, велат дел од лекарите. Прим. д-р сци. Климент Матоски, специјалист по педијатрија,  вели дека носењето маски има многу позитивна заштитна улога, но и дека долгото носење маска има и лоши последици.

-Преку маска потешко се дише, а со тоа се намалува квалитетот на вентилација на белите дробови со доволно кислород, вели Матоски.

Родителите дополнително се револтирани поради тоа што во рестораните, ноќните клубови и дискотеките никој не носи маска, а децата се приморани да ја држат маската по 8 часа дневно. Револтот на социјалните мрежи особено се зголеми деновиве откако се раширија фотографии од музичкиот фестивал, каде што младите во голем број беа збиени во гужвата и не носеа маски.

Овој револт со споредби зашто некој прави нешто, а јас не, досега не донел резултати и е во најмала рака небулозен бидејќи споредбата на неспоредливи работи донесе до целосна конфузија и апатија во општеството. За разлика од тоа издржаните логични размислувања поткрепени со факти се неприкосновени и затоа доколку инцијативата Стоп за задолжителното носење на маски во училиштата сака да успее потребно е да се придржува кон овие стандарди.