Почина актерката Хајден Панетиер, ѕвездата на „Heroes“ и „Nashville“ – имаше само 36 години

Американската актерка Хајден Панетиер, позната по улогите во популарните серии „Heroes“ и „Nashville“, почина на 36-годишна возраст. Веста за нејзината смрт ја потврди семејството преку нејзиниот публицист, додека причината за смртта засега не е објавена и се истражува.

Панетиер стекна светска слава со улогата на Клер Бенет во серијата „Heroes“, каде го играше ликот на средношколка со способност за брза регенерација. Серијата започна да се емитува во 2006 година, кога актерката имаше само 17 години, а нејзиниот лик брзо стана еден од најпрепознатливите во продукцијата.

Нејзината кариера, сепак, започна многу порано. Панетиер се појавувала пред камерите уште како дете, а меѓу нејзините рани ангажмани е и гласот на Дот во анимираниот филм „A Bug’s Life“. Подоцна играше во „Remember the Titans“, како и во филмовите од франшизата „Scream“.

Две номинации за Златен глобус

По успехот на „Heroes“, Панетиер оствари уште една од најзначајните улоги во кариерата – Џулиет Барнс во музичката драмска серија „Nashville“, која ја играше од 2012 до 2018 година.

Нејзината интерпретација ѝ донесе две номинации за Златен глобус, а серијата дополнително ја потврди нејзината позиција меѓу познатите американски телевизиски актерки.

Публиката ја памети и како Кирби Рид во „Scream 4“, улога на која се врати повеќе од една деценија подоцна во „Scream VI“. Нејзината последна филмска улога беше во психолошкиот трилер „Sleepwalker“ од 2026 година.

Причината за смртта засега не е позната

Семејството побара приватност по нејзината смрт, а официјална причина засега не е соопштена. Според Reuters, околностите се предмет на истрага.

Хајден Панетиер зад себе ја остави ќерката Каја, која ја доби од врската со поранешниот светски шампион во бокс Владимир Кличко. Нејзиниот помлад брат, актерот Јансен Панетиер, почина во 2023 година на 28-годишна возраст.

Со кариера која започна уште во детството и продолжи повеќе од три децении, Панетиер остави значајна трага во американската телевизија и филм, а за милиони гледачи ширум светот ќе остане запаметена пред сè како Клер Бенет од „Heroes“.