Поради токсичен воздух откажани се десетици летови од аеродромот во Сараево

Во Сараево воздухот стана толку загаден што летовите беа откажани на аеродромот. Швајцарската компанија IQAir, која го мери неговиот квалитет во реално време, го оцени како „многу нездрав“ со оценка 225. Со тоа босанската престолнина е на третото место меѓу градовите со највалкан воздух во светот.

Проблемот го одредуваат различни фактори – местоположбата на градот во долина, употребата на дрва и јаглен за греење, лошото урбанистичко планирање и други. Балканските метрополи имаат лоша репутација на градови со нечист воздух. Податоците за 2023 година покажуваат дека Сараево, Скопје, Белград, Атина и Тирана се на првите 5 места во Европа за загадување со ситни честички.

„Тоа е страшно. Нè гуши. Особено луѓето со срцеви заболувања. Едвај дишам, едвај зборувам. Тоа е катастрофа. И никој не прави ништо околу тоа. Навистина не ми се верува дека тоа се случува во главниот град на Босна и Херцеговина. Владата не може да направи ништо за нечистиот воздух“, вели Хаира Субашиќ, жителка на Сараево.

„Често одам на планина, што ми помага да бидам поздрав. Сепак, не знам колку долго ова може да ме издржи. Мислам дека во нашите станови е уште полошо бидејќи парното е вклучено и го суши целиот воздух, кислородот. Не можеме ни да го отвориме прозорецот“, нагласи Нада, друга жителка на главниот град на Босна и Херцеговина, пренесува Нова ТВ.