Планинската спасителна служба од Охрид со нова опрема за хеликоптерско спасување

Раководителот на Планинската спасителна служба, Антонио Додевски појасни дека се работи за специјализирани мултифункционални носилки и средства за имобилизација, кои првенствено се наменети за хеликоптерско спасување, но може да се користат и во случаи за спасување од технички комплексен терен, каде тежината и издржливоста на опремата имаат клучно значење за ефикасноста и брзината на операциите.

– Сетот се состои од мултифункционално носило KONG-LECO 2, наменето за транспорт на повредени во сите услови на технички терен, стрмни патеки, тесни премини, вертикални карпи… Опремено е со систем за подигање со хеликоптер, како и со систем за брзо и лесно фиксирање во хеликоптерот. Ова носило, овозможува лесен транспорт на повредени, од местото на несреќата до место погодно за слетување на хеликоптерот, но и негово прикачување и подигање од хеликоптер со помош на хеликоптерско витло, истакна Додески.

Опремата, додаде, е од реномиран италијански бренд, кој претставува лидер во светот на иновативните технологии за усовршување на опрема за спасување, која ги исполнува највисоките критериуми за безбедност.

– Благодарение на оваа опрема, како и соработката со хеликоптерските единици од армијата и полицијата, во иднина ќе можеме ефикасно да делуваме во прекуграничниот регион, но и пошироко, во случаи на комплексни операции за спасување, каде брзината и квалитетот на укажаната помош се од клучно значење за спасување на човечки животи, заклучи Додески.