Свет
Песокот од Сахара предизвика зголемување на загадувањето во Европа
Прашина и песок од пустината Сахара во Африка што изминатите денови ги затрупа деловите на јужна и централна Европа предизвика нагло зголемување на загадувањето на воздухот низ целиот регион, јавува „Еуроњуз“.
Од сателитскиот систем на Европската комисија, Коперник, рекоа дека во неделата се зголемило нивото на ПМ 10 честичките во градовите како Барселона, Лион и Марсеј.
🏜Saharan #dust has covered the snow in the Alps and Pyrenees, turning it orange. The #CopernicusAtmosphere Monitoring Service’s forecasts accurately predicted the development and trajectory of this dust plume days in advance.
Read more➡ https://t.co/psizEpxJbY pic.twitter.com/mBHQ5ascC1
— Copernicus ECMWF (@CopernicusECMWF) February 8, 2021
Облакот со ситен песок кој се разнесе северно од Алжир го затемни небото во црвена боја и се измеша со свежите врнежи од снег на Алпите и Пиринеите, претворајќи ги падините во портокалова боја. Ваквите појави се случуваат обично на пролет на северната хемисфера, објаснуваат од Коперник.
Се проценува дека неколку микрограми честички прашина на квадратен метар се разнесени во поголемиот дел на Европа помеѓу 4 и 8 февруари.
ПМ 10 честичките може да навлезат во белите дробови, и да предизвикаат потешкотии во дишењето, астматични напади и други здравствени проблеми, но концентрацијата на прашина од Сахара не ги достигна нивоата што се сметаат за штетни по човековото здравје.
