ЕкономијаМакедонија
ИНТЕРВЈУ Дејан Станчевски: Кога визуелната уметност ќе стане развојна стратегија – 15 години „DEOSOL MEDIA“
По повод 15 години од основањето на „DEOSOL MEDIA“, разговараме со Дејан Станчевски за еволуцијата од аналогна ера до вештачка интелигенција, за непроспиените ноќи во монтажа и за тоа како маркетингот со уметничка душа успева да изгради долготрајна врска со луѓето.
Годинава, маркетинг агенцијата и видеопродукција „DEOSOL MEDIA“ одбележува значаен јубилеј – 15 години од своето успешно работење. Она што започна како визија за создавање поинаква визуелна естетика, денес е етаблирана куќа со импресивно портфолио кое брои над 1.000 реализирани телевизиски емисии, документарни програми и повеќе од 100 видео спотови и корпоративни кампањи за домашни и меѓународни клиенти. Зад овој успех стои нејзиниот основач, Дејан Станчевски – режисер, продуцент и маркетинг стратег, кој успеа да изгради цврст мост помеѓу маркетингот, уметноста и чистата човечка емоција. Разговараме со него за патувањето низ времето, за уметноста надвор од корпоративните рамки, за уметноста, менторството и за тоа што навистина го движи напред по деценија и половина помината зад камерата и во маркетингот.
Г-дин Станчевски, честитки за овој прекрасен јубилеј – 15 години „DEOSOL MEDIA“. Кога ќе погледнете во ретровизорот, кон почетоците на агенцијата, со какви емоции сте денес?
Дејан Станчевски: Ви благодарам на честитките. Чувството е навистина преплавувачко, мешавина од длабока гордост, но и убава носталгија. Кога започнувавме, медиумскиот пејзаж во Македонија беше комплетно поинаков од денешниот и светот сè уште доминантно се потпираше на традиционалните медиуми – телевизијата, радиото и печатот. Примарната визија на „ДЕОСОЛ МЕДИА“ уште од првиот ден беше да понуди врвна визуелна естетика комбинирана со паметно стратешко размислување. Сакавме да докажеме дека маркетингот на овие простори може да има уметничка душа и дека техничката извонредност не значи ништо ако зад неа нема човечка приказна.
Технологијата во меѓувреме направи квантен скок – преминавме од аналогна во комплетно дигитална ера, а денес веќе зборуваме и за имплементација на вештачка интелигенција. Но, она што не се промени е сржта на нашата работа: добрата, автентична приказна. Алатките се менуваат, но човечката емоција и потребата за квалитетна комуникација остануваат исти. Токму затоа, најголемата емоција денес не ми ја будат бројките или наградите, туку луѓето со кои го одевме овој пат. Кога ќе се сетам на сите непроспиени ноќи во монтажа, на возбудата пред секоја премиера или на младите момци и девојки кои кај нас ги направија првите чекори, а денес се врвни професионалци – тоа е вистинскиот успех. Тоа вреди повеќе од секој деловен договор.
Самиот сајт deosol.mk зборува за огромна продукција – преку илјада ТВ формати и над стотина видеа. Како се балансираат трите столба на кои почива агенцијата: медиумите, продукцијата и маркетингот, без притоа да се изгуби креативната свежина?
Дејан Станчевски: Медиумите, продукцијата и маркетингот за мене се трите витални органи на еден жив организам. Ако маркетингот е умот кој ја планира стратегијата, тогаш продукцијата е срцето кое ја вдахнува емоцијата, а медиумите се гласот кој ја пренесува пораката до публиката. Балансот се одржува кога во секој проект, без разлика дали е тоа комплексен ТВ проект за национална ТВ станица или кратко корпоративно видео, внесувате дел од себе. Ние од почетокот одбивме да бидеме „фабрика“ која механички штанца содржини. Затоа на нашиот сајт нема да најдете само ладни логоа на клиенти, туку ја презентираме суштината на нашата работа – визуелната нарација. Мора да ја сакате оваа професија до болка за да издржите 15 години во постојана креативна тензија и секогаш да нудите нешто свежо.
Она што ве издвојува како креативец е фактот што вашите активности многу често излегуваат надвор од класичната деловна работа на агенцијата. Познати сте по уметничките ангажмани – го режиравте документарниот филм „Овој град не препознава херои“ за бендот „Милко“ кој беше прикажан на „Cinedays“ или документарниот серијал “Невидлива Македонија”, а имате и соработка со театарската претстави и музички настани. Зошто ви е потребен овој простор надвор од бизнисот?
Дејан Станчевски: Искрено, не ги доживувам овие проекти како нешто надвор од бизнисот, туку како негово природно продолжение. Креативноста не може да се стави во рамка и да биде ограничена само на маркетинг кампањи и корпоративни проекти. Потребата да создаваш приказни, да пренесуваш идеи и да отвораш важни теми е многу поширока.
Во изминатите години работев на повеќе авторски проекти – од ТВ серијалот „Моето дете“, кој обработува теми поврзани со семејството и родителството, преку „Екобаланс“, посветен на екологијата и одржливиот развој, па сè до кулинарското шоу „Брзи и едноставни рецепти“ и проектот „Архитектура“, кој ги афирмира вредностите на современото творештво и урбаната култура. Посебно место имаат квизовите за деца, кој покажа дека младите и денес имаат огромен интерес за знаење кога тоа е претставено на интересен и современ начин.
Токму ваквите авторски проекти ми даваат простор да експериментирам, да истражувам и да создавам содржини што имаат поширока општествена вредност. На крајот, без разлика дали станува збор за маркетинг, документарен филм, телевизиски серијал или детски квиз, суштината е иста – да создадете приказна што ќе допре до луѓето и ќе остави трага.
Вашата активност надвор од бизнисот вклучува и еден многу силен општествен и едукативен сегмент. Имате потпишано официјален меморандум за соработка со Универзитетот „Еуропа Прима“ со цел практична поддршка и продуцирање млади филмски кадри. Што е она што ве мотивира да бидете ментор на младите?
Дејан Станчевски: Мотивот е едноставен – сакам да го вратам долгот кон професијата и да им го олеснам патот на новите генерации. Соработката со „Еуропа Прима“ (поранешно ЕСРА) за мене не е само формалност на хартија. Сакам тие млади луѓе, студенти по филмски уметности, да дојдат во нашето професионално студио и на терен, да ги допрат камерите, да ја почувствуваат атмосферата на реална монтажа и да научат како да се справат со вистинските медиумски предизвици. Кога ќе видам искра во очите на некој студент додека му објаснуваме како се поставува светлото за да се долови одредена драма, тоа за мене е чиста среќа. Менторството не е само учење на другите, тоа е и учење за себе – младите ми даваат неверојатна свежина во размислувањето.
Работите и како личен ПР консултант за јавни личности и лидери. Честопати велите дека вашата задача не е да креирате „лажни маски“, туку да ги подготвите луѓето за јавни настапи и да ги водите низ кризи. Колку е тешко емотивно да се издржи тој товар во денешното време на социјални мрежи каде линчот е секојдневие?
Дејан Станчевски: Тоа е можеби најтешкиот и најдискретниот дел од мојата работа. Кога менаџирате личен бренд во криза, вие не работите со компанија, туку со живо човечко битие кое има стравувања и емоции. Денес социјалните мрежи можат да уништат нечија репутација за неколку часа. Мојата улога во тие моменти не е само стратешка, туку многу често и чисто човечка – да бидам смирен глас во бурата. Ние ги подготвуваме тие луѓе за јавни настапи, ги учиме како да ја канализираат тремата и како да останат доследни на својата вистина, бидејќи јавноста секогаш ја препознава глумата. Тоа е работа која бара деноноќна посветеност и апсолутна лојалност.
Денес секој со паметен телефон во рака се смета за креатор на содржина (content creator). Како во едно такво хипер-продукциско време „DEOSOL“ успева да ја докаже вредноста на професионалната продукција?
Дејан Станчевски: Точно е дека технологијата се демократизираше и денес секој има алатка за снимање во џебот. Но, постои огромна разлика помеѓу „содржина“ и „стратешка содржина“. Инфлуенсерскиот и брзиот интернет маркетинг имаат свое место на пазарот и ние активно го менаџираме тој дел за нашите клиенти. Сепак, кога еден бренд сака да изгради долгорочна доверба, кога сака да раскаже приказна која ќе трае со години, потребна е сериозна продукциска архитектура – од квалитетно сценарио, филмско осветлување, прецизен аудио-дизајн, па сè до ПР стратегија која ќе спречи потенцијална криза. Клиентите брзо сфаќаат дека евтините и брзи решенија носат само инстант резултати, додека сериозниот бизнис бара професионален пристап.
По 15 години „DEOSOL MEDIA“ во светот на медиумите, што е следно? Каде ја гледате идната визија и кој е новиот сон на Дејан Станчевски?
Дејан Станчевски: Следниот голем предизвик е комплетна дигитална трансформација на медиумските формати. Светот се менува брзо, младите генерации веќе не консумираат содржини на традиционален начин. Активно работиме на развој на сопствени независни дигитални платформи и интернет портали кои ќе понудат интелигентна, едукативна и визуелно супериорна видео содржина. Но, мојот најголем личен сон останува ист како и на почетокот: да продолжам да раскажувам приказни кои ќе ги допрат срцата на луѓето. Јубилејот од 15 години е само убава прилика да им кажам едно големо „благодарам“ на сите соработници, клиенти и пријатели кои беа дел од ова патување. „DEOSOL MEDIA“ продолжува напред со уште поголема страст, бидејќи најдобрите приказни допрва треба да ги снимиме.
Интервју: Д. Саздова
