Научниците гласаа за нов начин на кој ќе се дефинира поимот килограм

Оваа промена се случува по 130 години откако беше воведена претходната дефиниција за килограм, кога тежината на еден килограм беше измерена според тегот наречен „Големото К“.

Според изворите кои беа присутни на конференцијата, килограмот не е единствената мерка која претрпе измени преку гласањето на научниците. Променети беа уште и Амперот, Келвинот и молот, како и останатите изведени единици како Волт, Ом и Џул.

„На овој проект работам многу кратко време, но многу сум возбудена поради промената. Ќе биде тешко да се навикнам дека килограмот повеќе не е исто каков што го паметам целиот живот, но новиот систем е чекор напред и ќе работи многу подобро. Ова е возбудлив момент за сите нас“, вели Перди Вилијамс, научник од Националната лабораторија за физика на Велика Британија.

„Големото К“ беше единица мерка која го одредува килограмот од 1889 година па досега. Но, овој тег и неговите копии полека почнаа да стануваат полесни, а тоа ја направи потешка работата на оние кои треба да одредат која е вистинската мерка за еден килограм. Поради тоа, отсега па натаму килограмот нема да се мери според универзален тег кој ќе се чува во затворена просторија, туку преку математичка равенка која ќе се користи секаде низ светот.

Ова е посебно важно за луѓето кои работат во индустриите каде тежината на нивните производи или состојки е многу важна. Оваа промена е клучна за индустриите за производство на лекови и нанотехнологии а индустриската прецизност на новата мерка е ставена најнапред, во фокусот.