Над 1.000 загинати во катастрофалните поплави на Хималаите, повеќе од 5.000 лица се водат како исчезнати

Бројот на жртвите од катастрофалните поплави што ги погодија Непал и Тибет се искачи на повеќе од 1.000, додека над 5.000 лица сè уште се водат како исчезнати, соопштија локалните власти, пренесува ДПА.

Според најновите податоци на полицијата во Катманду, само во Непал загинале 1.007 лица, додека во кинескиот регион Тибет досега се потврдени 16 жртви.

Непалските власти предупредуваат дека конечниот биланс би можел да биде значително поголем. Речиси 4.600 лица се водат како исчезнати во Непал, а уште околу 550 во Тибет. Меѓу исчезнатите има и стотици странски државјани.

Катастрофалната ненадејна поплава носела огромни количества вода, кал, мраз и урнатини, уништувајќи сè на својот пат во пограничниот регион. Многу села се целосно разурнати, а голем број жители останале без своите домови и имот.

Експертите веруваат дека катастрофата била предизвикана од масовно уривање на глечери на тибетската страна, по што огромна водена маса се спуштила кон населените подрачја.

Илјадници припадници на спасувачките служби продолжуваат да пребаруваат низ урнатините и затрупаните тунели во потрага по преживеани.

Операциите се одвиваат во исклучително тешки услови поради лошото време и опасноста од нови ненадејни поплави, што дополнително ја отежнува потрагата по илјадниците исчезнати лица.