Мистеријата за Бенкси можеби е решена по две децении

По повеќедецениски шпекулации, истрага на Ројтерс тврди дека конечно е откриен идентитетот на мистериозниот уличен уметник Бенкси. Според нивните наоди, зад псевдонимот стои Робин Ганингем од Бристол, кој подоцна наводно го сменил името во Дејвид Џонс.

Истрагата се темели на сведоштва, документи и податоци за движење, а како еден од клучните докази се посочува стар запис од апсење во Њујорк во 2000 година, поврзан со Ганингем.

Новинарите ја следеле трагата и до Украина, каде што уметникот наводно стои зад мурали на урнатини од војната. Дополнителни податоци од гранични премини ја зајакнуваат врската меѓу Ганингем и идентитетот на Бенкси.

Сепак, од тимот на уметникот ги негираат овие тврдења. Неговиот адвокат предупреди дека ваквите објави може да ја загрозат неговата приватност и безбедност.

И покрај тоа, Ројтерс ја објави приказната, повикувајќи се на јавниот интерес за откривање на идентитетот на еден од највлијателните уметници денес.