Зимски пејзаж на средината на март во селото Дреново

Она што зимата го пропушти во својот ударен период, како да сака да го надомести на своето заминување. Жителите на селото Дреново-Бродско во неделата ги разбуди зимски пејзаж создаден од снежната белина. Месното население беше по малку изненадено но и задоволно што ќе има повеќе вода, а и природата нема предвреме да се разбуди поради претходно повисоките температури, невообичаени за овој период од годината.

– Со зимата никогаш нема шега, а карактерот на природата често е непредвидлива категорија. Така, деновиве, кога се бележеа пролетни температури од над 20 степени и кога започнаа да цветаат овошките, утринава бевме изненадени и, наместо сончевина и топло пролетно време, дочекавме снежна белина и вистинска зимска идила на средината на март. Во нашиов регион не е новина во март да паѓа снег, но последниве неколку години снежните врнежи беа сѐ послаби и речиси ги немаше, па ова што се случи утрото во неделата е по малку невообичаена појава – вели жител на селото Дреново.