Диви свињи го окупираа Рим

Последниве неколку дена, жителите на Рим мака мачат со дивите свињи што го окупираа главниот град на Италија. Дивите свињи во потрага по храна се движат низ градските улици и блиските паркови, а храната ја наоѓаат во преполните контејнери, пренесе „Асошиејт прес“. Според процените на одговорните, повеќе од два милиони диви свињи живеат во Италија, а се проценува дека има помеѓу пет-шест илјади диви свињи во регионот Лацио, кој го опкружува Рим.
Пред две години беше започната програма за фаќање на овие животни, а од минатиот месец е дозволен селективен лов, што претходно беше строго забрането.
– Се плашам да одам по улица, бидејќи има контејнери во близината на тротоарот, а потоа се случува да скокнат пред вас – рече 79-годишната жителка на Рим, чекајќи ги своите внуци пред основното училиште.
Причината за загриженост не е неоправдана, бидејќи дивите свињи се високи 80 сантиметри, долги 1,5 метар, можат да тежат и до 100 килограми, а не се безопасни, особено за деца и млади луѓе.

Извор novamakedonija.mk