Вонредна состојба, државата продолжува да функционира, вкупно 42 лица заболени до сега

На вонредна прес конференција претседателот на државата, Стево Пендаровски, прогласи вонредна сосотјба во траење од 30 дена, на цела територија на Република Северна Македонија поради заштита на граѓаните од КОВИД-19.

Пендаровски нагласи дека Владата ќе продоложи да функционира како техничка и наспроти сè, ова е можност сите политички партии да покажат дека можат да работат заеднички за здравјето на луѓето и нема да се грижат за својот политички рејтинг. Со оваа одлука се откажуваат изборите закажани за 12 април, а како што кажа Пендаровски, а предвремени парламентарни избори ќе се закажат дури кога ќе се создадат услови за фер и демократско изјаснување на граѓаните.

*

Министерот за надворешни работи Никола Димиторв апелираше да се спроведе итна регистрација на македонските граѓани затечени во странство поради ситуацијата со корона вирусот

*

Како одговор на најавената вонредна состојба, Народната банка вечерва информира дека и по прогласувањето на вонредна состојба, финансиските институции за кои таа е надлежен регулаторен и супервизорски орган – банки, штедилници, менувачници и правни субјекти за брз трансфер на пари, продолжуваат да работат и да ги извршуваат своите клучни функции, со што нивните услуги и натаму ќе бидат достапни.

*

УЈП најави дека нема да презема дополнителни мерки кон даночните обврзници.

*

Има доволна количина на тестови, близу 1.500 во овој момент, а има најава и за донација од илјада тестови и наша набавка за уште илјада која треба да заврши во текот на оваа недела, изјави министерот за здравство Венко Филипче на денешната прес-конференција. Тој ја поздрави и одлуката на претседателот Пендаровски за прогласување вонредна состојба.

„Од 38 тестирани, позитивни на коронавирус се 7 лица, 3 од Дебар и 4 од Скопје.

Во текот на денешниот ден се регистрирани вкупно 11 нови случаи на коронавирус. Со ова, бројката на заболени од вирусот во земјата, состојба до 21:00 часот, изнесува 42. Состојбата на сите пациенти е стабилна“, информираше министерот за здравство Венко Филипче.

*

„Во вонредна состојба, државата и општеството продолжуваат да функционираат, а правата и слободите не се ограничуваат по автоматизам“, истакна техничкиот премиер Оливер Спасовски на својот Фејсбук профил. Тој додаде дека во моментот нема одлука за нови рестрикции во движењето и извршувањето на професионалните обврски на граѓаните. Остануваат мерките со кои се забранети сите јавни собири на отворено и во затворени објекти, објасни Спасовски, а ќе се засилат контролите спроведувањето на овие мерки за доброто на граѓаните. За сите дополнителни мерки од Владата јавноста ќе биде навремено информира

*

Во Дебар пристигна хуманитарна помош што е донација од Црвенот крст на Република Северна Македонија. Помошта се состои во прехранбени артикли, средства за одржување хигиена, ќебиња, душеци, детска, машка и женска облека. Складирана е во магацинските простории на дебарската организација на Црвен крст.

*

Основното јавно обвинителство Кавадарци денеска поднесе предлози за казнен налог за седум лица, сите од Кавадарци кои во одделни случаи го сториле кривичното дело – Непостапување според здравствени прописи за време на епидемија од член 206 став 1 од Кривичниот законик.