Агенцијата за катастар од денеска со нови, пониски, цени

Агенцијата за катастар на недвижности од денеска воведува нови, пониски, цени за голем дел од своите услуги. Според измените на тарифниците, цените на најчесто користените услуги се намалени за 75%.

Со овие измени, на пример, доколку граѓаните купат стан или гаражен простор, за услуга ќе плаќаат 1.250 денари за четири имотни листови, наместо досегашните 5.000 денари. Исто така, наследните решенија и договорите за подарок сега ќе се наплаќаат по правен основ во една катастарска општина за истата сума од 1.250 денари, без разлика на бројот на имотни листови.

Директорот на Агенцијата, Иван Живковски истакна дека во наредниот период, фокусот ќе биде на дигитализацијата на катастарот, што ќе ги направи услугите уште подостапни за граѓаните и правните лица.