Хибридна војна против просветните работници и СОНК

Деновиве сме сведоци на огромен хибриден напад од страна на власта кон штрајкувачите и организаторите и целокупниот образовен систем во Македонија, се служат со веќе познати методи преку медиска пропаганда со оцрнување на просветните работници, лепење лажни етикети и спинување со неповрзани ситуации. Па така секојдневно можеме да видиме нарачани текстови и интервјуа каде наместо да се бара решение за ситуацијата се оцрнуваат штрајкувачите. Се шпекулира и се користат и директни закани кон поединци и организации.

Наставници од неколку скопски училишта кои се пожалија дека директорите им се заканиле со одземање на дневниците за деновите на штрајкот доколку не го прекинат штрајкот, дури и изјавиле дека лично министерот за образование Јетон Шаќири им се јавувал со барање да ја организираат наставата „како знаат и умеат“.

На ова наше прашање синдикалниот лидер Неделков вели дека и до СОНК имало јавувања од наставници кои се пожалиле на директорите, но вели дека не му се верува оти министерот лично им се јавувал на директорите, со тоа ризикувајќи го угледот на функцијата. Поверојатно е дека имало јавувања до директорите од лица од Министерството за образование или пак од други структури, оценува Нелков.

„Работа на СОНК е штрајкот да го реализира онака како што е зацртан и по сите правила, а министерството нека си ја тера својата работа. Но не се во ред заплашувања на наставниците. Тие реагираат затоа што некаде им се закануваат со одземање на дневниците за време на штрајкот или пак со работење во летни месеци. Како и да е, наши претставници ги посетуваат училиштата, имаме редовна комуникација со нашите претставници во училиштата, собираме докази“, нагласува Неделков.

Тој порачува дека СОНК многу сериозно го организира штрајкот и дека цврсто документираните докази за притисоци, заплашувања, кршења на уставното право на штрајк, ќе бидат доставени и до Меѓународната организација на трудот и до Европската конфедерација на синдикати во образованието.

Неделков појаснува дека е во ред што деновиве ученици се повикувани да дојдат на настава по оние предмети од наставници кои не потпишале согласност за приклучување на штрајкот.

„Се разбира, никогаш не сме рекле дека наставата во целост треба да биде прекината. Во ред е ако има можности за прифаќање на децата тие да одат на училиште и да ги посетат оние часови што ги држат наставници кои не штрајкуваат. Затоа и постојат простории каде се наоѓаат наставниците кои се во штрајк. Јавноста треба да знае дека настаавниците не седат дома, туку работното време го поминуваат во училиштата“, нагласува претседателот на СОНК Јаким Неделков, пренесува mkd.mk