Регионалната полиција соопшти дека 64-годишен маж е исчезнат и дека е во тек операција за пребарување и спасување. Селото беше евакуирано претходно во текот на неделата - околу 300 луѓе, како и целиот добиток, беа преместени на безбедно место. „Она што можам да ви кажам во моментов е дека околу 90% од селото е покриено или уништено“, изјави Стефан Ганзер, раководител на безбедноста во јужниот регион Вале, за локалната телевизиска станица Canal9. Регионалната влада соопшти дека голем дел од глечерот Бирх, над селото, се откинал и предизвикал лизгање на земјиштето. Блиското корито на реката Лонца исто така е блокирано. „Постои ризик ситуацијата да се влоши“, рече Ганзер, осврнувајќи се на блокираната река. Додаде дека армијата е мобилизирана откако претходните податоци покажаа дека глечерот се движи побрзо. На прес-конференција, швајцарскиот министер за животна средина Алберт Рести го нарече ова „вонреден настан“ и рече дека владата ќе преземе чекори за да им помогне на раселените жители. Швајцарските глациолози со години изразуваат загриженост за топењето на мразот, што во голема мера се припишува на глобалното затоплување, што го забрза повлекувањето на глечерите во Швајцарија. Оваа планинска земја без излез на море има најмногу глечери во Европа. Во 2023 година, жителите на селото Бриенц, во Источна Швајцарија, беа евакуирани пред огромна маса карпи да се сруши од планинската падина и да се спушти веднаш до селото. Бриенц беше повторно евакуирано минатата година поради закана од уште едно лизгање на земјиштето.
