Наставниците низ училиштата сведочат дека голем број ученици не знаат да одредат колку е часот кога ќе им се покаже класичен ѕиден часовник. Наместо тоа, тие се потпираат исклучиво на дигитални дисплеи кои го прикажуваат времето во бројки. „За децата денес стрелките се збунувачки, тие се навикнати на едноставен приказ – само да погледнат на екран и да видат 14:30. Механиката на движење на стрелките и разбирањето на часовите и минутите им станува апстрактно“, вели една наставничка од Скопје. Педијатрите предупредуваат дека оваа појава не е безазлена. Недоволното користење на рацете за пишување, цртање или ракување со предмети го забавува развојот на финиот моторен систем кај децата. „Кога детето само клика и лизга по екран, тоа не ги користи истите мускули и мозочни процеси како кога држи молив или манипулира со часовник“, објаснуваат експертите од Pedijatar.mk. Проблемот со аналогните часовници е само еден од многуте знаци дека дигиталната генерација расте во свет каде традиционалните вештини брзо исчезнуваат. Педагозите препорачуваат родителите уште од најрана возраст да ги учат децата да препознаваат стрелки и да го разбираат движењето на времето, како и да ги охрабруваат да пишуваат и цртаат со рака. Иако технологијата е неизбежен дел од модерниот живот, експертите потсетуваат дека рамнотежата е клучна. Научувањето на едноставни, но суштински вештини како читањето на часовник со показалки не е само прашање на традиција – тоа е важен дел од развојот на логиката, вниманието и чувството за време кај најмладите.
