Астрономите направија историско откритие кое може засекогаш да го промени човечкото сфаќање за животот во универзумот. Со помош на вселенскиот телескоп „Џејмс Веб“, истражувачите детектирале траги од хемиски соединенија кои на Земјата се создаваат исклучиво од живи организми. Станува збор за диметил сулфид (DMS) и диметил дисулфид (DMDS), соединенија што претежно ги произведува морскиот фитопланктон. Овие материи се откриени во атмосферата на планетата К2-18б, која се наоѓа на оддалеченост од околу 124 светлосни години од Земјата, во соѕвездието Лав. Планетата е класифицирана како „океанска суперземја“ — тип на екстрасоларна планета што се претпоставува дека има големи количини на вода и погодни услови за живот. Водечкиот истражувач, астрофизичарот Нику Мадхусудан од Универзитетот во Кембриџ, изјави дека шансите овие соединенија да се создадени преку случаен хемиски процес се речиси занемарливи — само 0,3 проценти. „Во моментов, не постои познат небиолошки процес што може да ги произведе DMS и DMDS во вакви концентрации“, изјави Мадхусудан. Ова откритие, иако не е конечен доказ за постоење на вонземски живот, се смета за најцврстата потврда досега за можно постоење на биолошка активност надвор од Сончевиот систем. Научниците сега се фокусираат на понатамошно анализирање на податоците и подготовка на нови мисии кои ќе ја испитаат оваа планета подетално. Планетата К2-18б, со нејзината густа атмосфера и можен течен океан, сè повеќе го привлекува вниманието на научната заедница како кандидат број еден за откривање на живот надвор од Земјата. Дали ова е првиот вистински сигнал од друг свет? Човештвото со возбуда и неизвесност го чека следниот чекор.
