Војната на Блискиот исток е „последица од распадот на дипломатијата“

Генералниот секретар на ОН, Антонио Гутереш повика на итен прекин на непријателствата на Блискиот Исток. „Ги повикувам сите страни да покажат максимална воздржаност за да избегнат каква било акција што може да доведе до големи воени конфронтации на повеќе фронтови на Блискиот Исток“, напиша Гутереш во серија твитови на X.

Светот се подели, а овие изнесени ставови ги потврдуваат двете страни и кој со кого е во војна:

Американскиот претседател Џо Бајден изјави дека САД „се посветени на одбраната на Израел“.

„Нашата посветеност на безбедноста на Израел против заканите од Иран и неговите полномошници е железна“, рече Бајден во изјавата, пренесе Си-Ен-Ен.

„Постојано нагласив дека ниту регионот ниту светот не можат да си дозволат нова војна.

Канадскиот премиер Џастин Трудо рече дека нападите „повторно го демонстрираат непочитувањето на иранскиот режим за мирот и стабилноста во регионот. Го поддржуваме правото на Израел да се брани себеси и својот народ од овие напади“.

Кина изрази „длабока загриженост“ поради „тековната ескалација“, според портпаролот на нејзиното Министерство за надворешни работи, додавајќи дека тоа е „прелевање на конфликтот од Газа“ и дека прекинот на огнот треба да се спроведе без одлагање. Пекинг ги повика „релевантните страни да покажат смиреност и воздржаност за да спречат понатамошни ескалации“.

Пакистан рече дека нападите се „последици од распадот на дипломатијата“.

„Со месеци, Пакистан ја нагласува потребата од меѓународни напори за спречување на проширување на непријателствата во регионот и за прекин на огнот во Газа“, се вели во соопштението на владата.

Саудиска Арабија, главен регионален ривал на Иран, ја истакна важноста од „спречување на какво било дополнително влошување“ на кризата, предупредувајќи на „страшни последици“ доколку ситуацијата се влоши.

Египетското Министерство за надворешни работи ги нарече последните случувања „опасна ескалација“. Во него се вели дека најновите непријателства не се „ништо туку директен резултат на она за што Египет постојано предупредуваше, во врска со опасностите од проширување на конфликтот во регионот како резултат на израелската војна на Појасот Газа и провокативните воени дејствија што се вршат во регионот.”

Катар, кој игра витална улога во многу конфликти на Блискиот Исток и ужива блиски економски односи со Иран, изрази „длабока загриженост“ и ги повика сите страни да „престанат со ескалацијата, да ги смират тензиите и да покажат максимална воздржаност“.

Во објавата на X, британскиот премиер Риши Сунак рече дека Британија „ќе продолжи да се залага за безбедноста на Израел и безбедноста на сите нејзини регионални партнери, вклучително и Јордан и Ирак.

Иран уште еднаш покажа дека има намера да сее хаос во својот двор“, рече Сунак.

На ова се надоврзаа и изјавите на лидерите во европските земји како Германија, Данска, Франција, Норвешка и Австрија.

Претседателката на Европската комисија Урсула фон дер Лајен ги нарече нападите „безобразни и неоправдани“. „Сите актери сега мора да се воздржат од понатамошна ескалација и да работат на враќање на стабилноста во регионот“, рече Фон дер Лајен.